تكريم من ملبورن

تكريم نادي شباب لبنان الاسترالي ـ فيكتوريا 2016 

ـ1ـ

شَبَابْ لُبنان الأسِتْرالي

حَبّ نتفه يْوَسّع مْجالي

حامل بِإيدو راية التكريم 

وحامل بـ قلبو أرزة جْبالي

ـ2ـ

تا إشكرو بالشّعْر.. صَفَّى الشِّعْر

بَيْرَق مْلَوَّن أبْيَض وأحمرْ

وهالأرزة اللي بينْفَدالا العمرْ

بْتِكْبَر.. وقت ما إسمنا بْيِكبَرْ

ـ3ـ

جايي تا إحكي كلمتين وبس

لبنان لازم للسما يِعْلا

ما هم لولا طال نور الشمس

نور الشمس ببلادنا أحلى

ـ4ـ

ملبورن بسيدني اليوم يا أحباب

يا مية أهلا ومرحبا فيها

غيّابها.. ما بيِنْسَموا غِيّابْ

ولاد الأصل.. هنّي أهاليها

بْتِكْريمها.. فتحت علينا بْوابْ

دروب الكَرَمْ مَفروض نِمْشيها

العرس عرسا والمجد بُوّابْ

وشربل بعيني الشّاعر اللّي شابْ

بيصرُخ بِعرس المجد: آويها

ـ5ـ

التكريم بدّي قدّمو لْخيّي

الْـ خلاّ الدّمع يبكي بِـ عينيي

مرسال.. شيخ شْباب.. لمّن غابْ

حسّيتْ إنّو الشّمس مِطْفِيّه

وإنّو العمرْ.. بِـ هالعمر كذّابْ

بْيِسْرُق بَشَرْ بقْلوبنا هِيّي

بِنْدَه يا خيّي.. والوجَعْ مزْرابْ

بْجَرّب تا إِنْسى.. بس ما فيي

واليوم وقّفْتُو الفرح عَ البابْ

إخوه إلي.. ما بقلّكن: أصحابْ

فُوتُوا عَ قلبي.. وْطَوّلوا شْويّه

**